الجير بوكس ( الفتيس ) وانواعه و صيانته

Last 4 Years Ago

الجير بوكس ( الفتيس ) وانواعه و صيانته

الفتيس أو الجير بوكس  او ناقل الحركة  

مانول أو اوتوماتيك

 الفتيس المانول: عبارة عن علبة تروس وليهم طقم دبرياج بينظم حركتهم أثناء الحركة والوقوف وده طبعا فتيس قليل المشاكل وصيانته قليله وعلي فترات متباعدة وبيوفر في استهلاك الوقود بشكل ملحوظ
الفتيس ده بيتكون من شوية نقلات أو غيارات 1, 2, 3, 4, 5R,,
وفيه عربيات الفتيس فيها بيبقي أربع غيارات مش 5 زي اللي فوق 1, 2, 3, 4, R ووظيفة كل واحدة كالآتي :-
الغيار الأول وده بيبقي للطلعة بس يعني يا دوب نطلع بالعربية وننقل علي النقلة اللي بعدها اللي هي 2 أو الغيار التاني ..
 الغيار التاني ودي النقلة اللي بننقل ليها بعد الطلعة الأولانية وبتستمر معانا لحد سرعة 40 كيلومتر تقريباّ أو 50 كيلومتر
 الغيار التالت ودي تالت نقلة في الفتيس وهنا لما تكون عايز تزيد عن سرعة الـ 40 كيلومتر وتوصل لحد 60­ كيلومتر أو 70 كيلومتر ..
الغيار الرابع والغيار ده أحيانا بيكون اّخر غيار في الفتيس وأحيانا بيكون هو الغيار قبل الأخير أو قبل الغيار الخامس يعني والغيار ده بتستخدمه لما سرعتك بتزيد عن سرعة 70 كيلومتر وتبتدي تدخل بقي في 100 كيلومتر فما فوق ..5 الغيار الخامس فـ ده زي ما قولنا في عربيات وعربيات بس عامةّ الأغلب بيبقي فيه خامس حتي الألتو الـ 800 سي سي دخلها خامس والغيار ده بنستخدمه لما نحب نزود السرعة بعد الـ 130 والغيار ده بيريح الموتور جداّ أما ال R ده طبعآ المارشدير يعني الجوع للخلف.

غيار زيت الفتيس المانيوال : طبعا غير معقد وتعامله سهل للغاية والزيوت المستخدمة فيه غير معقدة وحتى لو استخدمت زيت درجة لزوجته مختلفة مش هتقابل مشكلة كبيرة والوكيل مش هيخوفك منه

أنواع الفتيس الاوتوماتيك:

 اوتوماتيك ، استيبترونيك ، ايزي ترونيك ,

الاوتوماتيك التقليدي

: (P,D,N,R,1,2,3) بالنسبة للفتيس الأوتوماتك فيه أربع حارات أساسية وهي D ,N ,R ,P ووظيفة كل واحدة كالاّتي :-
وضع الـ P وده بنستخدمه في تثبيت العربية في مكانها وده لما تسيب العربية مركونة في أي مكان وهو نفس الغرض لما نيجي نعشق العربية المانيوال عند أي غيار لما نركنها عشان متتحركش ولكن الوضع P مش بيعشق الفتيس بالموتور وبالتالي نقدر ندور الموتور ع الوضع ده ..
وضع الـ R والوضع ده عشان نرجع بالعربية مارشدير ..
وضع الـ N وده وضع محايد يعني زي لما نمور العربية في المانيوال ونقدر برضو ندور الموتور في الوضع ده ..
وضع الـ D والوضع ده عشان نطلع بالعربية ولما بنسخدم الـ Dالفتيس بينقل مع نفسه وأنت كل اللي عليك إنك هتزود بنزين أو تدوس فرامل ..

استيبترونيك 

هو فتيس أتوماتيك وفيه الإمكانيه إنك تقدر تحوله لمانيوال يعني فيه D ,N ,R ,P وفيه كل حاجة زي اللي أتكلمنا عليها بس جنب الـ D هتلاقي فيه علامتين هم ( + ) و ( ­- ) وهو ده الجزء المانيوال اللي فيه واللي بدوره لما تجيبه علي الجزء بتاع + هتقدر تستخدمه بإن أنت تتحكم أمتي تعلي الغيار عن طريق لمس الفتيس في الإتجاه ( + ) أو أمتي تقلل الغيار عن طريق لمسه في الإتجاه ( ­- )
وعشان كدة بيسموه touch Manual لأن أنت بتنقل عن طريق لمسة في أي إتجاه من الإتجاهين
وتعتبر عيوب الفتيس إستيبترونك إنه بيكلف الموتور بنزين عالي وتكلفة صيانته تكاد تكون ناااااااار
ولكن مميزاته برضوإنه بيدى عزم وسحب أقوى من الأوتوماتيك لأن المانيوال بطبعه أقوى من الأوتوماتيك وده اللى بيخلى عربية زى الفيكترا (إيزى ترونيك) تتفوق على الجيتا والأوكتافيا (إستيبترونيك) فى السحب مع إنهم نفس الحجم والوزن وقوة الموتور ..

:أيزي ترونيك

فتيس مانول بس بصيغة تلقائية و مش محتاج تعشق تروس , انت بتتحرك بس بين  +D  D-

الايزي ترونك بيحتوي ع 3 حارات هم ( – ) , ( + )  , R ,N

زيت الفتيس الاوتوماتيك

الورش تقولك لازم نغير الزيت بإستمرار التوكيل بيقول لو غيرت زيت الفتيس هتخرج من الضمان وان زيت الفتيس مش بيتغير مدي الحياة صفحات الفيس منقسمة و متضاربة طيب ايه الحل خلينا اكلمك علمي ، مبدئيا مفيش زيت يتعرض لضغط و حرارة وأكسدة واحتكاك وشوائب ومرور وقت وتقول انه مش هيفقد خواصة (بالطبع لازم يفقد جميع خواصة ) يبقي لازم يتغير طبعا بس المهم تغير الزيت المناسب للسيارة و تعرفه من كتالوج السيارة و يفضل بعد ٣٠-٤٠ الف كم حسب الطريق واسلوب القيادة

مواصفات زيت الفتيس الاوتوماتيك كتير جدا وكل سيارة ليها مواصفة خاصة بيها بعض أنواع زيوت الفتيس علي سبيل المثال لا الحصر ‏DII , DIII , D IV , DV , D VI , SPII , SP III , SP IV , MATIC S , ‏AG 52 , AG 55 , AG 60 , CVT , WS , JWS , DCT.......

يفضل تغير فلتر زيت الفتيس في حالة سهولة فكه في بعض السيارات** 

في طريقتين لغيار زيت الفتيس : الطريقة الأولي : وهي اننا نغير الزيت اللي موجود في خزان الفتيس (كارتيرة الفتيس ) وفي الغالب هيكون من ٣ الي 4 لتر

الطريقة التانيه عن طريق عمل فاكيوم للفتيس و بيتم تغير الزيت بالكامل في حالة انك حطيت زيت مش مناسب وعايز تنزله كله او العربية مرفوعة بقالها فتره طويله بدون استخدام - مافيش داعي ليها لو تم تغير الزيت في مواعيده ملحوظة مهمة ( الطريقة العادية بتغير نصف كمية الزيت الموجودة داخل الفتيس ، مش كل الزيت   بيتغير لان لسه موجود زيت في قربة الفتيس و زيت الكولر اللي بيتبرد مع الرداتير) مهم جدا لضمان سلامة الفتيس لابد من استبدال الزيت والفتيس بارد تماما

لو اتاخرت في تغير زيت الفتيس اعمل ايه ....

في رأيين -  وليك حرية الاختيار:-
الأول وهو :-  تغير الزيت في أسرع وقت (طبعا الجزء ال بينزل عادى بدون فاكيوم حوالي 4 كيلوا تقريبا بيختلف حسب كل عربيه) وبعد 10000 – 15000 كم يتم تغيرة مرة اخري

.الثانى وهو:-  ان يتم تغير كيلو واحد فقط من الزيت  كل 1000 كيلو– وده لان الفتيس بيكون تأقلم علي لزوجة وضغط الزيت الموجود و لتجنب التغير المفاجي خصوصا فى حالة سوء حالة الزيت بدرجة كبيرة 

 يجب عمل رسيت للكنترول الفتيس او ما يسمي بالتكويد بعد تغير زيت الفتيس وخصوصا فى حالة وجود تنتيش بسيط***